न्यूज डेस्क | असोज २, २०८२ बिहिबार
काठमाडौं । काठमाडौं महानगरपालिकाका नगर प्रहरी प्रमुख राजुनाथ पाण्डेले ‘जेनजी’ आन्दोलनकारीले आगजनी गरेका सम्पत्ति जोगाउन दमकल प्रयोग गर्न खोज्दा ढुंगामुढा भएपछि तत्काल आगो निभाउन नसकिएको बताएका छन् ।
बोलाइएको ठाउँमा समयमै दमकल नपठाएका कारण देशले ठूलो क्षति व्यहोर्नुपरेको जनगुनासो आएसँगै महानगर प्रहरी प्रमुख पाण्डेले यस्तो बताएका हुन् ।
बिहीबार (असोज २) बागदरबारमा पत्रकार सम्मेलन गर्दै उनले आन्दोलन, आगजनी र तोडफोडका कारण दमकल सडकमा निस्कन नसकेको जिकिर गरे । भदौ २४ गते साँझ बौद्धबाट निस्कन खोज्दा चाबहिलमा आएपछि दमकलमाथि नै ढुंगामुढा गरिएको उनले बताए । नेपाली सेनाको गाडीमा पनि ढुंगामुढा गरिएको उनले उल्लेख गरे ।
भदौ २४ गते बेलुका सवा ८ देखि राति पौने १० सम्म सिंहदरबारमा दुई दमकल लगेर आगो निभाएको उनले स्पष्ट पारे । सेनाले सुरक्षाको जिम्मेवारी लिएसँगै आगो निभाउन सहज भएको उनको भनाइ थियो ।
भाटभटेनी सुपरमार्केट, हिल्टन होटेल, सर्वोच्च अदालत, प्रमुख प्रशासनिक केन्द्र सिंहदरबारमा पनि दमकल परिचालन गरिएको उनले बताए । दमकल जान सक्ने अवस्थामा महानगरले ढिलाइ नगरेको उनले जिकिर गरे ।
महानगरपालिकाले उपत्यकामा पाँच दमकल परिचालन गरेको उनले बताए । महानगर प्रहरी घाइतेको उपचार, खानपानको व्यवस्थामा समेत खटिएको उनले जानकारी दिए ।
असोज २, २०८२ बिहिबार
असोज २, २०८२ बिहिबार
भदौ ११, २०८२ बुधबार
भदौ ११, २०८२ बुधबार
भदौ ११, २०८२ बुधबार
भदौ १०, २०८२ मंगलबार
